ЕРӨНХИЙЛӨГЧ Х.БАТТУЛГА ЗАСГИЙН ГАЗАР, УИХ-ЫН ГИШҮҮДИЙН ХАМТ ТАВАНТОЛГОЙ-ЗҮҮНБАЯН ЧИГЛЭЛИЙН ТӨМӨР ЗАМЫН БҮТЭЭН БАЙГУУЛАЛТЫН АЖЛЫН ЯВЦТАЙ ТАНИЛЦЛАА

2019 оны 10 сарын 25

         Монгол Улсын Ерөнхийлөгч Х.Баттулга энэ сарын 22-23-ны өдрүүдэд Өмнөговь аймгийн Цогтцэций /Тавантолгой/ сумаас Дорноговь аймгийн Зүүнбаян хүртэл баригдаж буй 414.6 км төмөр замын трассын дагуух ажлын явцтай танилцлаа.
Энэ үеэр Ерөнхийлөгчийг дагалдан Зам, тээврийн хөгжлийн сайд Б.Энх-Амгалан, Уул уурхай, хүнд үйлдвэрийн сайд Д.Сумъяабазар, Гадаад харилцааны сайд Д.Цогтбаатар, УИХ-ын Төсвийн байнгын хорооны дарга Б.Чойжилсүрэн, УИХ-ын Байгаль орчин, хүнс, хөдөө аж ахуйн байнгын хорооны дарга Х.Болорчулуун, УИХ-ын гишүүн Н.Амарзаяа, О.Баасанхүү, Б.Дэлгэрсайхан болон О.Содбилэг нарын гишүүд бүтээн байгуулалтын ажилтай танилцлаа.

           Мөн түүнчлэн Зэвсэгт хүчний Жанжин штабын дарга, хошууч генерал Д.Ганзориг болон “Монголын төмөр зам” ТӨХК, УБТЗ ХНН-ийн удирдлагууд Монгол Улсын Ерөнхийлөгч, Засгийн газар, УИХ-ын гишүүдэд хариуцсан ажлаа танилцуулж, “…энэ ондоо багтан Зүүнбаянгаас эхлэн 50 км төмөр замыг тавьж дуусгахаар ажиллаж байгаа” гэдгээ дурдлаа.

          Өнөөдрийн байдлаар бүтээн байгуулалтын ажилд 30 орчим аж ахуйн нэгж, Зэвсэгт хүчний 7781, 7782, 110, 339 дүгээр ангийн цэргийн алба хаагчид үүрэг гүйцэтгэн цалинтай ажиллаж байгаа бөгөөд 414.6 км урт технологийн замаа тавьж дуусгасан.

           Энэхүү бүтээн байгуулалтын ажилд оролцож буй төрийн байгууллага болон хувийн компаниуд өвлийн улирал харгалзахгүйгээр суурийн далангийн болон дээд бүтцийн бэлдэц хийх, карьер гаргах зэрэг ажлуудаа гүйцэтгэж, ирэх жилийн гуравдугаар сарын эхэн гэхэд доод бүтцийн ажилдаа шуурхайлан орохоор төлөвлөжээ. Ийнхүү бүтээн байгуулалтын ажил улирал харгалзахгүй үргэлжилж байгаатай холбогдуулан зохих байгууллагууд уялдаа холбоогоо улам сайжруулж, зарим яамд тулгарсан асуудлыг нь түргэн шуурхай шийдвэрлэхээр болсон юм.

Эх сурвалж: Зэвсэгт Хүчний Жанжин Штаб


Сүүлд нэмэгдсэн
Видео
Дэлхийн цаг
Монгол
Афганистан
Өмнөд Судан
Сайтын тоолуур
Холбоотой байгууллагууд




Бүх эрх хуулиар баталгаажсан. Зэвсэгт хүчний Жанжин штаб. © 2019