Парад алхсан бүрэлдэхүүнийг МЗХ-ноос шагналаа

2015 оны 10-сарын 19

ОХУ-ын Москва хотын Улаанталбайд өнгөрсөн тавдугаар сарын 9-нд Аугаа их Эх орны дайны ялалтын 70 жилийн ойн хүрээнд, БНХАУ-ын Бээжин хотод өнгөрсөн есдүгээр сарын 03-нд Чөлөөлөх дайны ялалтын 70 жилийн ойн хүрээнд Монголын цэрэг эрс цэргийн ёслолын жагсаалд оролцсон билээ. Түүхт ойг тэмдэглэн өнгөрүүлсэн ОХУ, БНХАУ-ын удирдлага, Батлан хамгаалах яамдынх нь зүгээс Монголын талд цэрэг эрсээ оролцуулахыг урьсаны дагуу цэргийн ёслолын жагсаалд оролцоод ирсэн. Үүнтэй холбогдуулан ОХУ болон БНХАУ-ын Батлан хамгаалахын сайд нар Монгол Улсын Батлан хамгаалахын сайд Ц.Цолмонд “Дайчин цэрэг эрсээ цэргийн ёслолын жагсаалд оролцуулсанд талархлаа. Монголын цэрэг эрчүүд сүр хүчит, жавхаалаг сайхан алхлаа” хэмээн талархлын захидлыг ирүүлсэн байдаг юм.

Харин өнөөдөр Монголын Залуучуудын холбооноос эх орныхоо нэрийг өндөрт өргөж, цэргийн сүр хүчийг гайхуулсан бүрэлдэхүүнийг “Залуу удирдагч” одон, “Тэргүүний залуу”,  “Цэргийн алдар”, “Эр зоригийн алдар” гэсэн медалиудаар шагналаа. 

 

 Эхний ээлжинд Улаанбаатар цэргийн хүрээний 40 цэргийн алба хаагчийг шагнаж байгаа бөгөөд орон нутаг дахь Зэвсэгт хүчний ангийн алба хаагчдыг ээлж дараалан шагнах юм байна. ОХУ, БНХАУ-д болсон цэргийн ёслолын жагсаалд байлдагчаас хурандаа хүртэлх цолтой 18-40 хүртэлх насны залуус жагссан. Тэр дундаа ОХУ-д болсон парадыг Зэвсэгт хүчний 032 дугаар ангийн захирагч, хурандаа Л.Батболд командлан алхсан бол БНХАУ-д болсон парадыг Зэвсэгт хүчний 084 дүгээр ангийн захирагч, дэд хурандаа Б.Хаш-Эрдэнэ нар командлан алхсан юм.

Өнөөдрийн арга хэмжээнд Батлан хамгаалах яамны Стратегийн бодлого, төлөвлөлтийн газрын дарга, хурандаа Г.Сайханбаяр, ЗХЖШ-ын Ажиллагааны удирдлагын газрын дарга, хурандаа Ц.Батсайхан Монголын Залуучуудын холбооны Ерөнхийлөгч А.Мөнхбат нар оролцлоо. 

Холбоотой мэдээ



Зэвсэгт хүчний жанжин штаб. Бүх эрх хуулиар хамгаалагдсан. Вэб сайтын дизайн, програмчлалыг "ПХТ"