Зэвсэгт хүчний 2017-2018 оны сургуулийн жилийн Цэргийн сургалт бэлтгэлийн нэгдсэн төлөвлөгөөний дагуу ЗХЖШ-ын даргын тушаалаар Зэвсэгт хүчний ангиудын сэтгэл зүйчдийн дунд “Цэргийн сэтгэл зүйч” тэмцээнийг анх удаа 2 үе шаттайгаар зохион байгууллаа. Энэхүү тэмцээний зорилго нь Зэвсэгт хүчний ангиудын сэтгэл зүйчдийн мэдлэг, мэргэжлийн ур чадварт үнэлэлт, дүгнэлт өгч, мэргэжлийн бүрэлдэхүүний үйл ажиллагааг бодит байдлаар үнэлж дүгнэхэд чиглэгдсэн аж.
Тэмцээний 2 дугаар шатанд Зэвсэгт хүчний 015, 032, 150, 310, 350 дугаар ангиудын сэтгэл зүйчид өрсөлдсөнөөс тэргүүн байрт Зэвсэгт хүчний 150 дугаар ангийн сэтгэл зүйч, ахлах дэслэгч Н.Дэлгэрмаа, удаах байрт Зэвсэгт хүчний 032 дугаар ангийн сэтгэл зүйч, ахлах дэслэгч Б.Жавхлантөгс, 3 дугаар байрт Зэвсэгт хүчний 015 дугаар ангийн сэтгэл зүйч, дэд ахлагч Б.Алтан-Эрдэнэ нар шалгарав.
“Цэргийн сэтгэл зүйч” тэмцээнийг ийнхүү зохион байгуулснаар Зэвсэгт хүчинд сэтгэл зүйчийн албан тушаалд үүрэг гүйцэтгэж байгаа офицеруудын мэдлэг, мэргэжлийн ур чадварыг үнэлж дүгнэн цаашид тэднийг хэрхэн чадваржуулах талаар тодорхой мэдээлэл олж авсан нь тус тэмцээний гол үр дүн байлаа.
Сэтгэл зүйн ажлын үндсэн зорилго нь цэргийн алба хаагчдыг цагийн байдлын ямар ч нөхцөлд дасан зохицох, сэтгэл зүйн тогтворгүй байдлаас урьдчилан сэргийлэх, түүнээс гарах арга зүйд сургах, ажил, мэргэжлийн онцлогт тохирсон сэтгэл зүйн эерэг чанаруудыг төлөвшүүлэх, сэтгэл зүйн тогтвортой байдлыг бий болгох, тэдний биеийн болон сэтгэцийн эрүүл мэндийг хамгаалахад чиглэгддэг.
Цаашид энэхүү тэмцээнийг жил бүр уламжлал болгон явуулж, сэтгэл зүйчид харилцан туршлага солилцох, мэдлэг, мэдээллээ хуваалцах, өөрийгөө хөгжүүлэх нөхцөл, боломжийг нь бүрдүүлэхэд чиглүүлэн зохион байгуулах юм.

Эх сурвалж "Соёмбо" сонин.