БНӨСУ-д үүрэг гүйцэтгэж буй Монгол Улсын Зэвсэгт хүчний 13 дугаар ээлжийн цэргийн багийн бие бүрэлдэхүүн НҮБ-ын өмнө мандатаар хүлээсэн үүргээ амжилттай гүйцэтгэсээр байна.

      Тухайлбал, энэ сарын 4-ний өдрөөс 8-ны өдрүүдэд Юнити секторын командлагч болон цэргийн багийн захирагчийн тушаалаар ажиллагааны офицер хошууч Ц.Ринчингээр ахлуулсан салааны бүрэлдэхүүн Маёом суурингийн иргэдэд “Сэтгэл зүйн эрүүл мэнд”-ийн мэдлэг олгох сургалтыг зохион байгуулах НҮБ-ын ажилчдын аюулгүй байдлыг хангах хүрээнд Бентью-Маёом-Абеймном чиглэлд нийт 400 гаруй километрийн дөрвөн шөнө, таван өдрийн холын эргүүлийг гүйцэтгэлээ.

      Томилогдсон бүлэг Маёом сууринд “Хубилай 1” түр ажиллагааны баазыг байгуулж, НҮБ-ын ажилчдын аюулгүй байдлыг ханган, харуул хамгаалалтыг зохион байгуулсаны зэрэгцээ цагийн байдлыг тандах, мэдээлэл цуглуулах, хүний эрхийн зөрчлийг хянах, шалгах, илтгэх зорилгоор цааш Маёом-Манкейн-Абеймном чиглэлд эргүүлийн үүргийг давхар гүйцэтгэсэн юм.