Багануур дүүргийн Засаг даргын 2021 оны 10 дугаар сарын 04-ний өдрийн А/247 дугаар захирамж, Засаг Даргын Тамгын Газрын Цэргийн штабын 2021 оны цэргийн сургалт бэлтгэлийн төлөвлөгөөний дагуу Хорооны Засаг дарга нарын “Цэргийн бэлтгэл сургалт”-ыг хорооны зохион байгуулагч нарыг хамруулан Налайх дүүрэг дахь Зэвсэгт хүчний 353 дугаар ангийн сургалтын материаллаг баазыг түшиглэн 2021 оны 10 дугаар сарын 08-ны өдөр амжилттай зохион байгуулж явууллаа.

     Тус “Цэргийн бэлтгэл сургалт”-д Хорооны Засаг дарга, зохион байгуулагч нарын нийт 17 хүнд “Батлан хамгаалах салбарын багц хууль”, Дайчилгааны тухай хууль, Орон нутгийн хамгаалалтын тухай хууль, Дайны байдлын тухай хууль зэрэг иргэдэд батлан хамгаалах төрийн үйлчилгээг үзүүлэхэд холбогдох хууль, эрх зүйн мэдлэгийг олголоо. Мөн галын бэлтгэл хичээлээр автоматын анхны дасгал, гар бууны нэгдүгээр дасгалыг буудлагын скат төхөөрөмж дээр боловсруулсан.

     Сургалтад хамрагдаж буй бүрэлдэхүүнд Зэвсэгт хүчний 353 дугаар ангийн захирагч хурандаа Ш.Аюурзана ангийнхаа түүхэн замнал, үйл ажиллагааг товч танилцуулж, энэхүү сургалтад нь амжилт хүссэн юм.

     Сургалтын төгсгөлд Багануур дүүргийн ЗДТГ-ын дарга П.Баттүшиг, Цэргийн штабын дарга хурандаа З.Майдар, Зэвсэгт хүчний 353 ангийн захирагч хурандаа Ш.Аюурзана нар сургалтад амжилттай хамрагдсан Хорооны Засаг дарга, зохион байгуулагч нарт “Батламж”, дурсгалын зүйл гардууллаа.

АХМАД Б.НАНДИНЦЭЦЭГ