Зэвсэгт хүчний Агаарын цэрэг болон Иргэний нисэхийн хамтын ажиллагааны зөвлөлийн ээлжит хурал боллоо. Энэ удаагийн зөвлөлийн хуралд Зэвсэгт хүчний Агаарын цэргийн штабын дарга, бригадын генерал Б.Батбаяр, ИНЕГ-ын тэргүүн дэд дарга Б.Алтанцом болон албаны бусад хүмүүс оролцож зөвлөлийн 2020 оны төлөвлөгөө, өнгөрөгч оны үйл ажиллагааны тайланг хэлэлцэж, цаашид авч хэрэгжүүлэх, хамтран ажиллах арга хэмжээг тодорхойллоо.

        Мөн Иргэний нисэхийн болон Улсын нисэхийн эрх зүйн баримт бичгийг боловсронгуй болгох, “Чингис хаан” олон улсын нисэх буудлын хөөрөх, буух зурвасыг түр хугацаанд ашиглах, "МиГ-29УБ" сөнөөгч онгоцоор нислэг үйлдэх, ИНЕГ-ын зарим байгууламжийг Зэвсэгт хүчний Агаарын цэргийн командлалд шилжүүлэх, олон улсын эрэн хайх, авран туслах дадлага сургуульд хамтран оролцох, нисэхийн зарим тусгай тоноглолтой техник хэрэгслүүдийг харилцан ашиглах зэрэг олон асуудлыг хэлэлцэж, зөвлөлийн 2020 оны төлөвлөгөөнд тусган хэрэгжүүлэхээр болов.