Батлан хамгаалах салбарт мэргэжлийн ахлагч бэлтгэж эхэлсэний 30 жилийн баярт өдөр Зэвсэгт хүчний Агаарын цэргийн харьяа Зэвсэгт хүчний 065 дугаар ангийн холбоо ротын станцын дарга,  ахлагч Б.Хулан, тус ротын тасгийн дарга, ахлагч М.Ариунтуяа нар АНУ-ын Агаарын цэргийн Ахлагчийн удирдлагын анхан шатны дамжаанд суралцах эрхээ авч энэ өдөр эх орноосоо хүлгийн жолоо заллаа.

     ЗХЖШ-ын Гадаад хэлний сургалтын төвд амжилттай суралцан шалгуур үзүүлэлтийг хангасан бүрэлдэхүүнийг Агаарын цэргийн штабын дарга бригадын генерал Б.Эрдэнэбат хүлээн авч уулзан цаашдын суралцах их үйлст амжилт хүслээ. Тэрээр Агаарын цэргийн командлалын харьяа анги, салбаруудаас анх удаа тэр дундаа хоёр эмэгтэй цэргийн алба хаагч дээрх дамжаанд суралцах болсонд баяртай байгаагаа илэрхийлэн, үүрэг хариуцлагаа ухамсарлан хариуцлагатай сайн суралцаж, залуу ахлагч нарт ялангуяа эмэгтэй ахлагчийн бүрэлдэхүүнд АНУ-д суралцах боломж байдаг гэдгийг харуулах ёстойг хэлсэн юм.

     Усны шувуу нисэн үл хүрэх газраас хүний хүү эрдэм өвөрлөн ирнэ ээ хэмээгээд Агаарын цэргийн нийт бие бүрэлдэхүүний өмнөөс аян замдаа сайн явж хүрээд их зүйл суралцаад ирэхийг хүсэн ерөөе.  

Ахмад Л.САРАНЗАЯА