ЗХЖШ-ын даргын тушаалын дагуу Монгол Улсын Ерөнхийлөгч, Зэвсэгт хүчний Ерөнхий командлагчийн нэрэмжит ёс зүй, бие бялдрын түвшин тогтоох хоёрдугаар шатны үзлэг Агаарын цэргийн командлал, Зэвсэгт хүчний 065 дугаар ангийн харьяа Дорнод аймагт байрлах 085 дугаар тусгай ротод амжилттай зохион байгуулагдлаа.

     Түвшин тогтоох үзлэгийн удирдамжид заагдсаны дагуу алба хаагчдаас “Цэргийн нийтлэг дүрэм”-ээр шалгалт авч, ёс зүй болон сэтгэл зүйн бэлтгэлжилтийг нийгэм-сэтгэл зүйн чиглэлээр боловсруулсан асуумж, хамт олных нь үнэлгээ хэлбэрээр зохион байгуулав. Мөн офицер, ахлагчийн дүрэмч, жагсаалч байдлыг нь жагсаалын үзлэг явуулах замаар шалгаж, дүрэмт хувцасны хэрэглээнд үнэлгээ хийж, бие бялдрын бэлтгэлжилтийн түвшинг “Цэргийн биеийн тамирын бэлтгэлийн стандарт”-ын дагуу хурд, хүч, тэсвэр, тусгай бэлтгэл, уян хатан гэсэн үзүүлэлтээр шалгав.

     Нэгдүгээр шатны үзлэг өнгөрөгч дөрөвдүгээр сард Агаарын цэргийн командлалын харьяа ангиудад зохион байгуулагдсан. Агаарын цэргийн командлагчийн тушаалаар томилогдсон ажлын хэсэг энэ цаг үед хоёрдугаар шатны үзлэгийг зүүн болон баруун бүсийн алслагдсан салбаруудаас түүвэрчилсэн байдлаар зохион байгуулж байгаа бөгөөд ерөнхий удирдамжийн дагуу тогтоосон хугацаанд явуулж удирдлагуудад бодит дүнг тайлагнах ба цаашид офицер, ахлагч нарыг хөгжүүлэх, чадваржуулах хөтөлбөр боловсруулан сургалтын төлөвлөгөөнд тусгах зорилготой юм.

Ахмад Л.САРАНЗАЯА