2024 оныг Зэвсэгт хүчний цөм болсон ахлагч нарын манлайллыг дэмжих жил болгон зарласантай холбогдуулан ирж буй ХVII жарны Хилэнт эх хэмээгч модон луу жилийн сар шинийн баярыг угтан Зэвсэгт хүчний 328 дугаар тусгай салбарын удирдлагын бүрэлдэхүүн, ахлагчийн зөвлөл хамтран Зүүнговь сумын зарим иргэдэд сэтгэлийн бэлэг гардуулан өгсөн юм.

     Тус салбарын бүрэлдэхүүн нийгмийн хариуцлагын хүрээнд иргэд, олон нийтийг чиглэсэн ажлуудыг шат дараатайгаар зохион байгуулдаг ба Зүүнговь сумын нийгмийн ажилтантай тогтмол холбоотой байж хамтран ажилладаг билээ.

     Энэ удаагийн төлөвлөгөөт ажлын хүрээнд нэгэн үед тус салбарын түүхийг бичилцэж явсан ажилтан, өндөр настан Б.Тогтох болон сумын 5 дугаар багийн айл өрхүүдээс олон хүүхэдтэй нэг өрх, гэр бүлийн гишүүн нь хөгжлийн бэрхшээлтэй нэг өрхийг тус тус сонгон сэтгэлийн бэлэг гардуулан өгсөн юм.

     Дэм дэмэндээ, дээс эрчиндээ хэмээн Монголчууд бид хэлэлцдэгийн учир эх орондоо тангараг өргөсөн алба хаагч бүхний сэтгэл сүү шиг цагаахан, рашаан ус мэт ундран оргилж байдаг юм.

Дэслэгч П.НАРАН-ОЧИР