Зэвсэгт хүчний Агаарын цэргийн гадаад хэлний сургалтын төвийн англи хэлний дунд шатны ээлжит төгсөлтийн арга хэмжээг 04 дүгээр сарын 12-ны өдөр зохион байгууллаа. Энэ удаагийн төгсөлтөөр Зэвсэгт хүчний Агаарын цэргийн командлалын харьяа анги, салбаруудын офицер, ахлагч нар төгсөж, сертификатаа гардан авсан юм.

     Төгсөлтийн арга хэмжээнд Агаарын цэргийн штабын дарга, хурандаа Б.Энхзоргол, Сургалт бэлтгэлийн хэлтсийн, сургалт, штабын бэлтгэлийн ахлах дэд хурандаа Г.Баатархүү нар оролцож төгсөгчдөд баяр хүргэж, сертификат гардууллаа.

     Төгсөгчдийг төлөөлж ахмад С.Энхсаруул англи хэл дээр талархал дэвшүүлсэн юм. Тэрээр “Юуны өмнө биднийг сургасан, эрдмээ хуваалцсан эрхэм багш нартаа талархлаа. Сурч мэдсэнээ ашиглаж Зэвсэгт хүчний Агаарын цэргийн хөгжил дэвшилд чадах хэмжээгээрэй хувь нэмрээ оруулан ажиллах болно” гэсэн юм.

     Арга хэмжээний төгсгөлд Хурандаа Б.Энхзоргол: Орчин цагийн Зэвсэгт хүчинд тавигдаж байгаа өнөөгийн шаардлагуудын нэг бол гадаад хэлний мэдлэг. Та бүхэн эндээс олж авсан мэдлэг, чадвараа уйгагүй хичээл чармайлтаар улам бүр сайжруулж чадаж гэмээнэ маш олон боломжууд та бүхний өмнө бүрэн нээлттэй байна. Сурсан эрдмээ эх орон, Зэвсэгт хүчиндээ үр бүтээлтэй ашиглахыг, өөртөө шинэ хаалга нээхийг уриалан захилаа.

     Мөн тэрээр одоо суралцаж байгаа бэлтгэл дунд шатны суралцагч нарт илүү сайн суралцахыг үүрэг болгосон юм.